so öpis gloubt mä nid.

mini liebschte, i hocke itz gad i üsem theater, ganz ällei, lose am pläschterä vo üsem piuz im pool zuä u luägä dr mond a. u itz gad i däm momänt, vermissi näch ungloublech fescht u würd näch so gärn aui knuddle. mis mami isch hüt wieder abgreist - mir hei ä wunderschöni zit gha u i sogar äs paar freii täg. aber itz geits wieder witer mit am morge am haubi 10ni ufstah, schnäu alege, zur besprächig u när los zur asag. direkt i chinderclub u am 12i geits wieder abe zum pool zum 12-aktiv-spiel. das geit bis am haubi 1 u när heimr ä haubstung pouse zum ässä.... när geits witer mit vorbereitige oder probe. am drü wieder asag u ab i chinderclub. dert simr när bis am sächsi (wes guät geit, süsch ou mau bis am haubi 7ni) ab und zuä het mä am viertu vor 7ni ou scho wieder solinoschmus (d ching dörfe ohni mami u papi ässä drfür mit dä animateure) u när geits ab id actionstung u direkt id minidisco. wemä glück eht, hetmä keh abedienscht isch aber süsch meistens mit vorbereitige oder so beschäftiget oder isch eifach mau nur froh, wemä ä haubstung cha go pfuse.... znachtässä faut bi mir normalerwis us, wüui ds fuu bi zum ufstah oder wüui di haubstung lieber öpis angers machä (und ässä mit de gäst isch eh nid mis liebschte ;)) näbscht solinoschmuus chas ou si dassmä restaurantaktion het... auso äntwäder ä haubstung dastah und aune gest ä guätä wünschä u verkünde wasmä fürne show het. oder äs standbiud 25 minute lang, und, und, und. när träffä mir üs normalerwis am haubi nüni zur vorbereitig fürd abeshow - deko, ufbou, schminke, alege und am haubi 10ni geits när mit dr show los. di geit meistens bis am haubi 11i u bis am 11i setzt mä säch när no zudä gescht. när wird uf-und abgruumt. und eigentläch heimr nächhär immer no äs meeting oder tanzprob. zwüsche 1 und haubi 2 simr när meistens fertig u hocke meistens ono chli dsume u plöiderlä zämä u sie när irgändeinisch nur no froh, wemr todmüed itz bett chöi gheie.... und da sötmä no zit für sini liebschte finge!? äs tönt immer so blöd, dass i ha doch eifach keh zit u würd mi aber gärn mäudä. u wärs nid mit eigene ouge gseh het, gloubts äuä ou nid. aber äs isch leider tatsächläch so. i bi froh, dass dir mi aber aui immer alächlet weni i mis zimmer inechume und weni schlafe immer i mire nöchi sit (föteli vo öich si rund um mis bett verteilt...) dir fählet mir ganz oft und äs wär ächt schön, weni mängisch no chli meh vo öich würd mitbrcho u mi ou meh chönnt mäudä. i chume zwar ganz viu nidmau drzuä uf öii mails ds antworte - aber schribet mr trotzdäm i lises u fröie mi, weni dsmingst weiss, was i öiem läbä so ablouft.
i hoffe itz, dasses im summer irgändeinisch we das ganze chli igspiut isch (und nüme immer lüt göh u wieder nöiii chöme...womr immer wieder aui tänz u aus müässä lehre....) wieder chli meh freizit hei und ig somit ou meh zit für öich!

i drücke öich ganz fescht, dänkä viu a öich und hanech aui ungloublech fescht gärn!!!!

<3 <3 <3