mon 19ème anniversaire!

DIXNEUF :D

auso am morge hani vor nathalie u vor patricia mini erschte chline geburigschänkli brcho. und zwar äs chlini zämäklappbari bürschte mit spiegeli und äs chlises büächli.
woni ir schuäu bi acho, hani di erschte dicke umarmige brcho und äs chlises schoggichüechli vor dinah.

die fantastische vier hei wie immer ihri kaffipouse im kaffi näbädr schuäu verbracht. u da d sofia natürläch het müässä verzeue, dassi geburi ha, hani mi vor umarmige u münschis chume meh chönne rette. d frou vom bsitzer, chunnt äbä wesi dert isch scho süsch aui immer cho abküsse u am geburi laht sie eim anschinend fasch nüme los. äs glück, dassi no luft ha brcho ;)

miter vanessa u dr andrea simr när ines restaurant go pizza ässä u wie dir när wärdet erfahre, wirdi no froh um ä "normali" mauzit gsi si :)

nach dr schuäu simmer go bowle u mi gloubts chum, aber i ha (gloub ds erschte mau i mim läbä) tatsächläch gwunne. u das trotzdäm, dassmr ä gruppe bestehend us 8 si gsi :D eifach geniau!

isch no ä achti person - üse lehrer - ungerhaub womä d punktzau leider nid gseht... aber sie isch öpä 88 gsi ;) 

i bi de när hei u voilà da het scho ä brief vor meie uf mi gwartet. eifach zucker! merci meiäli!
d rose, wo ds mami für mi het kouft u itz irgändwo ir wohnig ds münchebuchsi umestöh hani per skype ono schnäu dörfe bestune :) gli druf hets de när znacht gäh u dr ex-maa vor nathalie het säch ono gad iglade. irgändwie komisch. är isch ziemläch speziel, het nur gmotzt u het ds erschte mau hie gässä. eja :)
u zum ässä hets - WELCH ÜBERRASCHUNG - tatsächläch härdöpfu gäh. guät, usnahmswis härdöpfustock :) und äs grusigs hamburgerfleischli. mhh, nid unbedingt ds geburiässä woni mr gwünscht hät, aber drfür hani ä mega feine chuächä - mit 19 cherzli - brcho :D

am abe si d vanessa, d andrea, d sofia und ig no is le plein sud. schad heimr di bar ersch itz entdeckt. äs isch super gmüetläch gsi und het erstundläch viu lüt gha fürne mäntig. normalerwis düä hie ja viu bars sogar am weekend scho am 1 zuä aber mir hei glück gha. i ha mega schöni ohrepänk u äs härzigs t-shirt sowie ä oberliebschti charte gschänkt brcho. und bi dr ganz tag - gägä mi wiue - iglade worde....
somit heimr dert ä super luschtige abe verbracht...........

irgändwelchi type hei befunde, si müässi für mi geburtstag doch itz no champagner choufe. d andrea het säch nüt mit denä ungerhaute u äs het schlussändläch sogar no ä 2. fläschä gäh :P mi muäss nur wüsse wie hää. aber da ig i däm ou hie nid besser bi worde, hani das gärn ar andrea überlah! ;) sie het de när bim heiloufe verzeut, dassi uf dr prischarte sig go luägä u 1 fläschä tatsächläch 72 euro kostet het.... :D

safety pants - hei ä längi story hinger säch ;) im loft si ungergrosse ire abnormale grössi gfunge worde u niemer weiss wäm di ghöre. luschtigerwis, heisi die gad a däm sunnti gfunge, wo d andrea ir nacht bsuäch im zimmer het brcho. u wosi am nächschtä tag is loft isch zoge, het d vanessa ihre gseit, sie söu doch di ungerhose näh, äbä aus safety pants :) u itze machä mr immer witze drüber u gester simr irgändwie wieder druf cho und i ha d andrea aus witz gfragt, obsi ihri safety pants drbi het u sie het sä doch tatsächläch us dr täschä zoge ;)

womr üs de när am haubi 4i ufd suächi nachemnä taxi hei gmacht, heimr eifach kehs gfunge. nid mau a dä taxistäng.... ungloublech! somit heimr när zum loft müässä loufe (u äs het ganz luschtigi videos gäh woni hie itz aber nid cha veröffentlächä ;)) u i ha de när nachemnä grosse ässä am haubi füfi am morge (d andrea het ä ganze salat, ä haubi wurst, äs croissant u öpä 7 cracker verdrück ;)) gad dert pfuset. u das bis hüt am mittag :) d andrea isch vorbiudlecherwis id schuäu, we ono haub betrunke aber i ha ds gfüäu gha, da ig no nie gfäut ha, darfi mir das ou einisch erloube. u wenn isch besser, aus am tag nach dim geburi? :)

ou weni mini liebschte gloub no nie so vermisst ha wie geschter, hani doch ds beschte drus gmacht u bi sicher, dassmr mi 19. u erscht geburi im usland wird i gueter erinnerig blibe.